Մարդիկ ու օտարները

Քաղաքը պատրաստվում էր գժտության: Քաղաքում այդ բառով անվանում էին մի վիճակ ու իրադարձություն, որը ուրիշ երկրներում ու քաղաքներում կոչում են ընտրություն: Քաղաքում արդեն վաղուց այդ իրադարձությանը ընտրություն չէին ասում, ու մարդիկ արդեն մոռացել էին այդ բառի ու հասկացության բուն իմաստը, որովհետեւ երկար տարիներ զրկված են եղել ձայնի, քվեի, ընտրելու իրավունքից: Նրանք տարիներ շարունակ ընտրել էին իրենց նախընտրած մարդուն ու մարդկանց խմբերին, բայց ընտրվել ու հաղթանակ էին տարել ուրիշները: